HUN

A tlan thuai thuai a, um phak loh a hlau hle a nih hmel a,a thaw hlawp hlawp a,a tlan zel tho a........ Engvanga tlan vak nge a nih kan zawt hram a,chiang mang lo hian,".......k...ka um," a ti a.....,"eng maw?", ka han tih leh pawh chuan a hre hman ta chuang lo a.

Nakinah chuan, ka in ngaihtuah ka in ngaihtuaha, thirsakawr ka la lawk a, ka va um ve ta ringawt a. Rei fe ka tlan hnu chuan a mawng phe hi ka va hmu pha vau vau a. Chawl miah lo in a tlan zel chu a lo ni a.Kan tang zual sauh a...ramhuai speed in ka um leh ta a. A zawn ka va thlen chuan," Engmaw i um?," kan ti leh a. Lo hawi let zauh pahin a ni chuan," Hun ka um," a ti lauh lauh a. A ngaihna ka hre lo ngei mai. Min chhanna chu ka hre sual a nih ringin ka um leh sauh sauh a," Engmaw i tih?'" kan ti leh fan a. Mi pawh en tawh mang lo hian," Hun ka um," a ti tham vung vung a. Dilchhut takin kei chuan," Chu chu eng nge a awmzia?," kan ti leh a. Min chhan tum hian a ang deuh zuau zuau a, mahse tlanpaha in chhan sen chi a ni lo aniang, a ngawi ta daih a." Ding lawk teh," kan ti ta ngawt a, mahse a ding awzawng lo, fiah manglo hian," Ding hman ka ni lo," tiin min rawn chhang leh hram a.

Ka tlan thui ve viau ta bawk a, thlan a sa tawh hle a, thaw a lianin khaw hmuh a phe tak ruai ruai avangin ka din san ta a. Rawmawla in hruk nauh nauh pah chuan chu pa chanchin chu ka ngaihtuah zui neuh neuh a. Hun han um ngawt mai chu umphak a har dawnin a va atthlak em ka ti a, ka tui in hak bawrh bawrh chuan ka nui leh rih a. Ka tui hak a reh meuh chuan, chu pa chu ka han thlir zui leh a, mahse a rim pawh ka hre pha ta lo. Chhun ang zawr mai hian ka thinlungah chuan thu a lo thleng a.....Kha pa pui roh kha HUN chu lo ni ta se...ka va chan chiang em!!! A tak ramah zawk phei chuan HUN hian min lo nghak lo reng reng a, a liam zung zung a, auh din theih lah a ni si lo, auh let tum ngat phei chu changela sawi bel tum ang hlauh!!! A liam zel dawn a, a hmang thiam apiangte tana hlu leh inchhirna tlem mai a lo ni he HUN hi.